المغربي ديال اليوم مابقاش كيسافر غير من مدينة لمدينة، ولى كيجوب القارات؛ تلقاه طالب كيقرا فكندا ولا فرنسا، معتمر غادي للديار المقدسة فالسعودية، سائح كيكتاشف تركيا ولا البرازيل، رجل أعمال، وطبعا الملايين من الجالية ديالنا (مغاربة العالم) لي كيجيو ديما لأرض الوطن.
مع هاد السفر كلو، ضروري ماتطيح فشي موقف خايب فالمطار: طيارة تلغات فآخر لحظة، تأخير ديال سوايع لي كيخربق ليك البروكرام، ولا باكاج (حقيبة) مشى ليك بين جوج قارات. فهاد المواقف، المسافر المغربي غالبا كيبقى حاير، وكيسحاب ليه بلي شركات الطيران كيديرو لي بغاو، وأقصى حاجة يقدر ياخدها هي شي “اعتذار” ولا شي ساندويش و قرعة دالما.
هاد الفكرة غالطة 100%!
تعويضات الطيران للمغاربة ماكتعتمدش على الجنسية ولا لون الباسبور ، ولكن كتعتمد على “مسار الرحلة” (منين طرتي وفين غادي) و”أشمن شركة طيران”. بفضل واحد الشبكة ديال القوانين الدولية والوطنية، نتا محمي بترسانة قانونية كتفرض على شركات الطيران يتهلاو فيك، ويعطيوك تعويضات مالية صحيحة تقدر توصل لآلاف الدراهم.
فهاد الدليل، غادي نفككو هاد القوانين الدولية (الأوروبية، السعودية، الكندية، البرازيلية، التركية، واتفاقية مونتريال)، وغادي نحطوها ليك بطريقة عملية ومن منظورك نتا كمسافر مغربي، مع أمثلة عل السيناريوهات لي تقدر توقع ليك فمطارات العالم.
المحتوى
اتفاقية مونتريال (MC99)
قبل مانهضرو على قوانين الدول، خص أي مسافر مغربي يحفظ واحد السمية: “اتفاقية مونتريال لسنة 1999”. المغرب موقع ومصادق على هاد الاتفاقية، وهادشي كيجعلها قانون خدام ومقبول فالمحاكم المغربية والدولية.
إمتى كتطبق اتفاقية مونتريال؟ كتطبق على أي رحلة “دولية” بين جوج دول موقعين على الاتفاقية (وهي تقريبا أغلب دول العالم). هنا ماتهمش جنسية الشركة؛ غير تفوت الحدود بين جوج دول أعضاء، الاتفاقية كتخدم.
شنو هي الحقوق لي كتعطيك؟ الاتفاقية كتحط سقف للتعويضات بواحد العملة سميتها “وحدات السحب الخاصة” (SDR) ديال صندوق النقد الدولي (وحدة وحدة كتساوي تقريبا 13.5 درهم).
- إلا تعطلات بيك الطيارة (المادة 19): الشركة مسؤولة على الضرر لي وقع ليك بسباب التأخير. التعويض كيوصل لـ 5,346 وحدة سحب (تقريبا 72,000 درهم). ولكن هنا خصك تثبت “الضرر المادي أو المعنوي” لي وقع ليك (مثلا: مشات ليك ليلة خلصتيها فالأوطيل، ضاعت ليك خدمة…).
- إلا ضاع ليك الباكاج ولا تهرس ولا تعطل (المادة 17 و 22): إلا وصلات فاليزتك مهرسة، ولا تعطلات أيام، ولا ضاعت كاع، الشركة ملزمة تعوضك بواحد المبلغ كيوصل لـ 1,288 وحدة سحب (تقريبا 17,000 درهم).
أحسن ميزة للمسافر المغربي: حسب المادة 33، من حقك كمسافر مغربي تدعي شركة الطيران (واخا تكون أجنبية) فـ المحاكم المغربية، بشرط تكون الشركة عندها وكالة فالمغرب، ولا تكون الوجهة النهائية ديالك هي المغرب. هادشي كيهنيك من تمارة ديال المحاكم برا.
تعويضات الطيران فالمغرب (القانون المغربي (40.13))
بزاف كيسحاب ليهم بلّي التعويض كاين غير في أوروبا. هادشي غلط! المغرب عندو ترسانة قانونية قوية بزاف:هاد القانون هو “الدستور” ديال الطيران في المغرب. كينص صراحة على أن المسافر عندو الحق في التعويض والمساعدة إلا طرا شي مشكل.
شحال ديال الفلوس يمكن ليا ناخد؟
التعويض المادي في القانون المغربي (40.13) كيعتمد على المسافة، ماشي على ثمن التذكرة:
- 2500 درهم (250€): للرحلات القصيرة (أقل من 1500 كلم) – بحال من كازا لمدريد.
- 4000 درهم (400€): للرحلات المتوسطة (بين 1500 و3500 كلم) – بحال من الرباط لباريس أو بروكسيل.
- 6000 درهم (600€): للرحلات الطويلة (أكثر من 3500 كلم) – بحال من الدار البيضاء لجدة، نيويورك، أو مونتريال.
تخيل معايا: عائلة فيها 4 ديال الناس تأخرات بيهم الطيارة لفرنسا، من حقهم يطالبو بـ 16,000 درهم مجموع التعويضات!
تعويضات الطيران فأوروبا (القانون الأوروبي EC 261/2004)
هاد القانون من أقوى القوانين فالعالم. حيت كنسافرو بزاف لأوروبا، هاد القانون كيقيس المغاربة تقريبا يوميا.
إمتى كيشملك هاد القانون؟
- كيطبق: إلا كنتي طالع من أي مطار داخل أوروبا (مثلا: من باريس لكازا)، كيفما كانت الشركة (واخا تكون لارام، أو رايان إير، أو إير فرانس).
- كيطبق: إلا كنتي غادي من المغرب لأوروبا، ولكن بشرط تكون الشركة لي راكب معاها أوروبية (بحال رايان إير، ترانسافيا).
- ماكيطبقش: إلا كنتي مسافر من المغرب لأوروبا مع شركة طيران ماشي أوروبية (بحال الخطوط الملكية المغربية أو العربية للطيران). فهاد الحالة، كيحميك القانون المغربي أو اتفاقية مونتريال.
التعويضات المادية (الفلوس): فالقانون الأوروبي ماخصكش تثبت الضرر، كيعطيوك فلوسك ديريكت فحال الإلغاء، التأخير الطويل (كتر من 3 سوايع)، أو رفض الإركاب (Overbooking):
- 250 أورو: للرحلات القصيرة لي قل من 1500 كلم (مثلا: طنجة – ملقة).
- 400 أورو: للرحلات المتوسطة بين 1500 و 3500 كلم (مثلا: كازا – باريس).
- 600 أورو: للرحلات الطويلة لي كتر من 3500 كلم.
حق الرعاية (يتهلاو فيك): من غير الفلوس، الشركة مفروض عليها تعشيك ولا تغديك، تعطيك أوطيل (إلا خصك تبات)، ووسيلة النقل، وتخليك دير مكالمات.
تعويضات الطيران فالسعودية: العمرة، الحج، الخدمة ولا السياحة (لائحة الطيران السعودي GACA)
حسب القانون الجديد ديال السعودية لي بدا فشهر 11 سنة 2023، أي مغربي غادي للعمرة ولا الحج ولا الخدمة او غير السياحة ولا عندو حماية واعرة بزاف.
إمتى كيطبق؟ على جميع الرحلات لي طالعة من السعودية (كيفما كانت الشركة)، والرحلات لي جاية للسعودية إلا كانت الشركة سعودية (الخطوط السعودية، طيران ناس…).
شنو كيعطيك هاد القانون؟ هاد القانون واعر حيت كيعوضك فبزاف الحالات بنسبة مئوية من ثمن التيكيات (التذكرة):
- إلا تعطلات الرحلة:
- تأخير من 3 لـ 6 سوايع: تعويض ديال 50 وحدة سحب (SDR).
- تأخير كتر من 6 سوايع: تعويض ديال 150 وحدة سحب.
- الرعاية: الماكلة والشراب كيبداو غير تفوت ساعة ديال التأخير!
- الرفض ديال الإركاب (Overbooking): إلا باعو كراسي كتر من القياس ومنعوك تطلع، كتاخد تعويض كيوصل لـ 200% من ثمن التيكيات ديالك.
- إلغاء الرحلة: إلا لغاوها قبل بقل من 14 يوم، كيوصل التعويض لـ 150% من ثمن التيكيات، زائد كيردو ليك فلوس التذكرة ولا يشوفو ليك طيارة خرى.
- الباكاج ضاع: التعويض كيوصل لـ 6568 ريال سعودي (حوالي 17 ألف درهم). وإلا غير تعطل الباكاج، كيعطيوك فلوس كل نهار باش تشري حوايجك (300 ريال سعودي فالنهار للرحلات الدولية).
تعويضات الطيران فتركيا (القانون التركي SHY-PASSENGER)
إسطنبول محطة مهمة للمغاربة لي غاديين لآسيا والشرق الأوسط. القانون التركي بحالو بحال القانون الأوروبي تقريبا.
- كيطبق على لي طالع من تركيا (بأي شركة).
- كيطبق على لي غادي لتركيا (غير مع الشركات التركية بحال توركيش إيرلاينز).
- التعويضات هي نفسها ديال أوروبا (250، 400، 600 أورو أو ما يعادلها بالليرة التركية).
تعويضات الطيران في كندا والبرازيل
1. كندا (APPR):
قانون قاصح بزاف، كيطبق على أي رحلة طالعة من كندا أو غاديا ليها، كيفما كانت الشركة. التعويض كيكون كبير إلا كان الغلط من الشركة (بحال مشكل تقني):
- تأخير 3 لـ 6 سوايع: 400 دولار كندي.
- 6 لـ 9 سوايع: 700 دولار كندي.
- كتر من 9 سوايع: 1000 دولار كندي.
2. البرازيل (ANAC 400):
هاد القانون كيطبق على الرحلات لي طالعة من البرازيل، وكيركز بزاف على “التهلاو فالمسافر” كتر من الفلوس:
- بعد ساعة: كيعطيوك أنترنيت وتيليفون.
- بعد ساعتين: كيعطيوك الماكلة.
- بعد 4 سوايع: كيعطيوك أوطيل وترانسبور. وإلا كنتي ساكن فنفس المدينة، كيردوك لدارك ترتاح.
أمثلة على السيناريوهات لي يمكن توقع للمسافر المغربي
سيناريو 1: من كازا لمونتريال مع الخطوط الملكية المغربية مثلا
- المشكل: الرحلة تلغات قبل بـ 24 ساعة حيت الطيارة خاسرة.
- القانون لي خدام: حيت غاديا لكندا، خدام القانون الكندي، وحيت طالعة من كازا، خدام القانون المغربي.
- حقك: تقدر تطالب بـ 1000 دولار كندي (إلا تعطلو عليك بزاف فالبديل) حيت العطب التقني داخل فمسؤولية الشركة.
سيناريو 2: من باريس لطنجة (مع رايان إير ولا لارام) مثلا
- المشكل: طيارة تعطلات 4 سوايع.
- القانون لي خدام: القانون الأوروبي 261 (حيت طالعة من مطار ففرنسا).
- حقك: الماكلة فالمطار، وتعويض ديال 400 أورو (المسافة بين باريس وطنجة).
سيناريو 3: من كازا لباريس (مع الخطوط الملكية المغربية) مثلا
- المشكل: تأخير ديال 5 سوايع.
- القانون لي خدام: رد البال! القانون الأوروبي ماخدامش هنا حيت طالع من المغرب ومع شركة مغربية. هنا خدام القانون المغربي 40.13 واتفاقية مونتريال.
- حقك: تقدر تطالب بتعويض بحال ديال أوروبا، وتقدر تمشي للمحاكم أو الإدارات المغربية.
سيناريو 4: من جدة لكازا (مع الخطوط السعودية)
- المشكل: منعوك تطلع للطيارة (Overbooking).
- القانون لي خدام: القانون السعودي (GACA).
- حقك: تاخد فلوس التذكرة، وتزيد عليها تعويض كيوصل لـ 200% من ثمن التيكيات، وطيارة اخرى للرجوع.
سيناريو 5: من كازا لإسطنبول (ضياع الباكاج)
- المشكل: وصلتي ومالقيتيش الباكاج، ودازت 21 يوم.
- القانون لي خدام: اتفاقية مونتريال.
- حقك: تدعي الشركة فالمغرب وتطالب بتعويض كيوصل لـ 17 ألف درهم تقريبا (على حساب شنو كان فالفاليزة).
إمتى ماعندكش الحق فالتعويض؟ (القوة القاهرة)
القانون ماكيظلمش الشركات إلا كان السبب خارج على إرادتها (ظروف استثنائية):
- الجو خايب (عواصف، ثلج).
- إضرابات مفاجئة ديال المطار (ماشي ديال خدامين الشركة).
- قرارات أمنية أو إغلاق الحدود. ملاحظة مهمة: واخا ماتعطيكش الشركة التعويض المادي فالهاد الحالات، راها ملزمة تعطيك حق الرعاية (الماكلة، والنعاس فالأوطيل). يعني ماتخلصش الأوطيل من جيبك!
كيفاش تاخد حقك؟ (خطوة بخطوة)
الشركات كيعولو على أنك غاتعيا وتسمح فحقك. باش تقلب عليهم الطاولة، تبع هادشي:
- وثق كلشي: صور الشاشة فالمطار لي فيها التأخير، خبي البوردينغ (Boarding Pass)، واطلب منهم ورقة كتأكد سبب التأخير.
- قضية الباكاج: إلا مالقيتيش الباكاج، ماتخرجش من المطار! سير لمكتب المفقودات وعمر واحد الورقة سميتها PIR، بلا بيها ماعندك حق.
- خبي التواصل (الفاتورات): أي حاجة خلصتيها بسباب التأخير (طاكسي، ماكلة، أوطيل)، خبي التوصيل باش يردو ليك فلوسك.
- دير شكاية: صيفط شكاية فالسيت ديال الشركة وطالب بحقك وذكر القانون (مثلا: كنطالب بـ 400 أورو حسب القانون الأوروبي).
- شكي للإدارة: إلا ماجاوبوش، طلع النيفو للطيران المدني ديال البلاد لي وقع فيها المشكل.
- الشركات المتخصصة: كاينين شركات ووكالات فالمغرب وعلى برا كيتكلفو بهادشي كامل بلا ماتخلصهم مسبقا. كيرفعو الدعوى وكياخدو نسبة (عمولة) غير إلا ربحو ليك التعويض. هادي أحسن طريقة إلا مابغيتيش تصدع راسك.
الحل السحري: “Airhelp خدمة نقية .. والربح مضمون”
هنا كايجي الدور ديال الحل الذكي لي بغيت نقترح عليكم. كاينين شركات متخصصة بحال منصة Airhelp لي الخدمة ديالهم هي “يجبدو ليك حقك من فم السبع”.
علاش هاد الشركة هي الاختيار الأفضل؟
- ماتخلص والو من جيبك: الشركة كتعمل بمبدأ “No Win, No Fee”. يعني إلا ماجابتش ليك التعويض، ماتخلصها حتى ريال.
- عمولة من التعويض فقط: الشركة كتاخد نسبة مئوية ديال 30% من المبلغ لي غادي تشدو من عند شركة الطيران. يعني الربح متبادل.
- هما لي كيصدعو راسهم: نتا كتعطيهم غير التذكرة (Ticket) والمعلومات، وهما كيتكلفو بالمراسلات، المحاميين، والمساطر القانونية حتى كيوصلوك فلوسك.
- أثر رجعي: واش عرفتي بلي تقدر تطالب بالتعويض على رحلات درتيهم هادي سنتين أو ثلاث سنوات؟ هاد الشركة تقدر تنبش ليك في الماضي وتجبد ليك حقك لي نسيتيه.
لمهم ماتنساش
نتا كمسافر مغربي، راك محمي بقوانين كتمتد من كازا لنيويورك لباريس ولجدة. هاد القوانين تدارت باش تحفظ الكرامة ديالك. فالرحلة الجاية، خلي هاد المقال فبالك، وتفكر ديما: حقك راه كاين، خاصك غير تزعم وطالب بيه!
